بۇل - اتىراۋ وبلىسىنداعى رەسەيمەن اراداعى شەكارادا ورنالاسقان بولىمشە. «قانداي مەملەكەتتىڭ دە تىنىشتىعى ەل مەجەسىن قىراعى كۇزەتۋدە جاتىر. ەلىمىزدىڭ باتىس قاقپاسى سانالاتىن بۇل نىسانعا ەر قوساي باتىردىڭ اتى بەرىلۋى – وتان قورعاۋشى شەكاراشى جاستارىمىزدىڭ بابا داڭقىنا كىر كەلتىرمەي, جاۋاپكەرشىلىكتى سەزىنە بىلۋلەرىن دە تالاپ ەتەدى» -دەيدى قۇرمانعازى اۋدانى اكىمىنىڭ مىندەتىن اتقارۋشى جاندوس بەكتەمىروۆ.
بيىل اتىراۋ شەكاراسىنىڭ قۇرىلعانىنا 20 جىل تولدى. وسى مەرەيلى داتاعا وراي وبلىستا ەكى جاڭا شەكارا زاستاۆاسى اشىلدى. ونىڭ ءبىرى وبلىس ورتالىعىندا ورنالاسقان, ال ەكىنشى زاستاۆا يساتاي اۋدانىندا. زابۋرىن اۋىلدىق وكرۋگىندە وبلىس اكىمىنىڭ قولداۋىمەن اشىلعان قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتى جاعالاۋ كۇزەتى وڭىرلىك باسقارماسى 2016 اسكەري بولىمىنە قاراستى زاستاۆاعا يساتاي باتىردىڭ ەسىمى بەرىلدى. شەكارا بەكەتتەرىنىڭ باتىر بابالارىمىزدىڭ قۇرمەتتەرىنە اتالۋى قازاق ەلىنىڭ ارىستارىن ۇمىتپايتىن, ۇلىقتايتىن ءۇردىسىنىڭ كۋاسى ىسپەتتى.
اسكەري ءبولىم كومانديرى مۇحتار قانابەكوۆ كاسپي تەڭىزىنىڭ اۋماعىندا مەملەكەتتىك شەكارانى كۇزەتۋ تاپسىرماسى جۇكتەلگەن جاڭا نىساننىڭ ىسكە قوسىلۋى بىرلەسىپ اتقارعان جۇمىستاردىڭ جەمىسى ەكەنىن ايتادى.
مەملەكەت باسشىسى «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا: ء«اربىر ولكەنىڭ حالقىنا سۋىقتا پانا, ىستىقتا سايا بولعان, ەسىمدەرى ەل ەسىندە ساقتالعان ءبىرتۋار پەرزەنتتەرى بار. وسىنىڭ ءبارىن جاس ۇرپاق ءبىلىپ وسۋگە ءتيىس» دەپ اتاپ كورسەتكەن بولاتىن. اتىراۋداعى شەكارا بولىمشەلەرىنىڭ باتىر بابالار اتىن ەنشىلەۋى شەكارا شەبىندە قالتقىسىز كۇزەتتە تۇرعان ساربازداردى وتانشىلدىق رۋحتا تاربيەلەپ, كەڭ بايتاق جەرىمىزگە قالقان بولعان قاھارماندار قاشان دا قۇرمەتكە يە ەكەنىن كورسەتەدى.
باقىتگۇل باباش,
«ەگەمەن قازاقستان»
اتىراۋ
